«Үкімет сағаты» аясында Мәжілісте мемлекеттік қызмет көрсету саласын дамыту туралы айттым.

«Үкімет сағаты» аясында Мәжілісте мемлекеттік қызмет көрсету саласын дамыту туралы айттым.

Біріншіден, осы қызметке тағайындалған сәттегі алғашқы шешімдердің бірі - мемқызметтер көрсету саясатын өзгерту, яғни қызметтерді басқа да қосымшалар арқылы алу мүмкіндігін қамтамасыз ету болатын. Мысалы, жыл басынан бері қолданушылардың 36 пайызы автокөліктерін банк арқылы қайта тіркеген, жыл аяғында 50 пайызға жеткізуді жоспарлап отырмыз, ал келесі жылы 80 пайызға жетсе дейміз. Осылайша біз азаматтарға қызметтерді ұсыну үрдісін жеңілдетіп, қажетсіз кедергілер мен қағазбастылықты жойғымыз келеді.

Сәби күтіміне қатысты жәрдемақыны тағайындау қызметін де осындай қарапайым қылдық. Мен көпбалалы әке ретінде жаңа босанған аналар құжаттарды рәсімдеу кезінде қандай қиындықтарға тап болатынын жақсы білемін. Бұл қызметті адам қарасы көп жиналатын жерге бармай-ақ алу мүмкіндігін ұсыну қажет деп шештік. Бұл тарапта бізге банктер қолұшын беріп жатыр. Мұндай сервис жуырда ғана іске қосылса да, аз уақыттың ішінде Halyk Homebank және Kaspi сервистері арқылы 500 өтінім қабылданды. Біздің ойымызша, осы сервистің арқасында ХҚКО-ға баратын адамдардың саны 400 мыңға қысқаруы тиіс.

Екіншіден, осындай қызметтерді кеңінен ұсыну үшін өмірлік жағдайларды сараптайтын Цифрлық трансформация орталығы құрылды. Тарқатып айтсақ, азаматтарға проактивті қызметтер көрсету, қызметтерді танымал банк қосымшалары арқылы ұсыну, цифрлық құжаттарды қолдану, биометриялық идентификация.

Үшіншіден, «Халық үніне құлақ асатын мемлекет» тұжырымдамасын жүзеге асыру үшін азаматтардың барлық арыз-шағымдары Әкімшілік рәсімдік-процестік кодекс аясында қаралатын бірыңғай ақпараттық жүйе жасалды. «e-Otinish» өтінімнің қаралу үрдісін бақылап, мемлекеттік мекеменің тиімді және нақты жауап беруін қадағалауға мүмкіндік береді.

Төртіншіден, ХҚКО-ның жаңа форматын қалыптастыру арқылы ұзынсонар кезекті жойып, тіпті орталыққа бару міндетінен босату – қызметтерді видеоқоңырау арқылы көрсету. Қазіргі таңда бұл бағыттағы пилоттық жоба төрт аймақта іске қосылған – Ақмола, Қостанай, Қызылорда және Павлодар облыстары.

Бесіншіден, 1414 бірыңғай байланыс орталығы (ББО) 34 млн қоңырау қабылдаған, бұл 2019 жылмен салыстырғанда 10 есе көп. ББО-ға екі мыңға жуық қызметкер тартылып, қызмет көрсету процесі қайта қаралды, операторлардың жауабын күту уақыты қысқарып (304 секундтан 16 секундқа дейін), нәтижелі қоңыраулар көлемі ұлғайды (69%-дан 99,1%-ға дейін) және т.б. Сондай-ақ операторлардың ынтасын көтеру мақсатында жалақыларын көтердік.

Алтыншыдан, күн сайын маған тұрғындардан интернет сапасына қатысты көптеген арыз-шағымдар түседі. Байланыс сапасын қадағалау аясында ұялы операторлар сапасыз қызмет көрсеткен жағдайда әкімшілік жауапкершілікке тартылады. Биылғы жылдың басынан бері 408 тексеріс жүргізіліп, 92,1 млн теңгеге айыппұл салынды. Бұл орайда, интернет сапасына қатысты арыз-шағымдарды біздің министрлікке ресми түрде жолдау қажеттігін қайталағым келеді, сонда ғана біз ресми өтінім негізінде тексеріс жүргізе аламыз.

Өткен аптада геостационарлық емес спутниктік жүйе жүргізілген Қосшыға барып, тұрғындарымен бірге байланысты сынақтан өткіздік. Бұл жүйені Интернетке кеңжолақты қатынауға жол ашып, байланыс саласын дамыту үшін елімізде кеңінен енгізуді көздеп отырмыз.

Сондай-ақ біз ГСЕО операторларымен де келіссөздер жүргізіп жатырмыз, соның ішінде SpaceX, OneWeb және SES те бар.

• 27.10.2021
• 209