«Ауыл-ел бесігі» жобасы аясында бірқатар нысандар тексерілді

ҚР Президенті Қасым-Жомарт Тоқаевтың және ҚР Премьер-министрі Асқар Маминнің берген тапсырмаларын орындау мақсатында Алматы облысындағы «Ауыл – Ел бесігі» жобасының аясындағы аяқталған және салынып жатқан нысандар бойынша сапарлар өтті.

Сапар барысында Іле ауданының Боралдай, Кербулақ ауданының Сарыөзек және Панфилов ауданының Сарыбел ауылында болып, әлеуметтік инфрақұрылымның жай-күйімен танысып шықтым. Атап айтқанда, орта мектепте өтіп жатқан кешенді жөндеу жұмыстарымен, сондай-ақ, жөндеуден өткен балабақша мен мәдениет үйінің ғимараттарын көріп өттім.

Бұдан басқа Ескелді ауданының Бақтыбай ауылындағы салынып жатқан газ құбыры мен газ бөлу желісінің құрылысымен танысып өттім.

Сондай-ақ, жұмыс сапары барысында Ұйғыр ауданының Чунжа ауылындағы жаңа дене шынықтыру-сауықтыру кешенінің құрылысын, Еңбекшіқазақ ауданының Масақ ауылындағы су құбыры желісінің қайта жөнделуін көріп қайттым.

Жұмыс сапарының қорытындысы бойынша облыс басшылығымен бірлесіп, әлеуметтік жобалар іске асып жатқан аудан бойынша аудан және ауыл әкімдерінің қатысуымен жиналыс өткіздім. Көрсетілген нысандардың  уақытында аяқталуы қажет екендігін назарға салдым.

Айта кетейік,  «Ауыл – ел бесігі» жобасы ауылдағы өмір сапасын жақсартуға бағытталған. Жолдардың құрылысы, сумен қамтамасыз ету, тұрғын-үй коммуналды кешені, денсаулық сақтау, білім, мәдениет, спорт саласындағы жаңа нысандарды салу және қайта жөндеу, жаңа жұмыс орындарының ашылуы осы бағдарламаның басты мақсаты.

Анықтама ретінде:  «Ауыл-ел бесігі» жобасы 2019 жылдан бері жүзеге асып келеді. Оның аясында ауыл халқының 90 пайызы өмір сүретін, әлеуеті мықты 3,5 мың ауылдық елді-мекен анықталды. Атап айтқанда, 1173 тіректі және 2 388 спутниктік ауылдар таңдалды.

• 29.10.2021
• 353