Қарағанды облысында ТОБЖ құрылысы аяқталды

Пионерское ауылында болып, базалық станцияны іске қосу шарасына қатыстым. Осы ауылға орнатылған базалық станция көрші орналасқан Центральное ауылын да жоғары жылдамдықтағы Интернетпен қамтуға мүмкіндік береді.

Қарағанды облысында соңғы екі жылдың ішінде 876 км ТОБЖ төселді! Өңірдегі 36 ауылда орналасқан аурухана, мектеп, әкімшілік ғимараты секілді 121 стратегиялық нысан Интернетке қосылды.

Енді ТОБЖ (оптикалық арна) негізінде ұялы байланыс операторлары өз желілерін дамытып, ел халқының 99% -дан астамын кеңжолақты Интернетпен қамтамасыз ете алады. Мұны елдегі цифрлық теңсіздікті жоюдағы серпіліс деуге болады. Ауыл тұрғындары мемлекеттік қызметтерді онлайн алса, ауруханалар телемедицинаны және т.б. пайдалану мүмкіндігіне ие болады.

Сондай-ақ "Террикон алқабы" IT-hub жобасын әзірлеушілермен кездестім. Бұл қазақстанның үздік әзірлеушілері мен IT-саласының мамандарын біріктірген бірегей жоба. Қарағандылықтар бүкіл республика тұрғындары қолданып жүрген WOOPPAY, Flip.kz немесе Hoster.kz. секілді сәтті ІТ жобаларымен мақтана алады.

Сол ауылдың тұрғынымен кездесіп, оның бейнебайланыс арқылы Қарағандыдағы облыстық аурухана дәрігерінен кеңес алғанын көрдім. Тапсырған анализдерінің нәтижесін ешқайда бармай-ақ, үйде отырып білді және сол бойынша дәрігерден кеңес алды. 

Пионерское және Центральный ауылдарының тұрғындары облыс орталығына бармай-ақ, дәрігер кеңесін үйінде отырып ала алады. Бұл телемедицинаның мүмкіндігі мен жалпы цифрландыру шараларының игілігі.

• 31.08.2020
• 487