Мемлекет басшысының Жолдауы аясындағы тапсырмаларын жүзеге асыру және Әділет органдарының цифрландырылуы туралы

29 желтоқсанда ҚР Президенті жанындағы Орталық коммуникациялар қызметінде Мемлекет басшысының Жолдауы аясындағы тапсырмаларын жүзеге асыру және Әділет министрлігінің цифрландырылуы туралы брифинг өтті. Шараға ҚР Әділет министрі Марат Бекетаев, ҚР Әділет министрлігі заңнама департаментінің директоры Алма Мұқанова қатысты.

Министрлік әділет органдарын цифрландыруды көздейтін Digital Justice – Цифрлық әділет бағдарламасы аясында жасалып жатқан жұмыстар жөнінде айтты. Әділет министрлігінің барлық 47 мемлекеттік қызметі жүз пайыз электронды форматқа ауыстырылды. Жыл басынан бастап төрт миллионнан астам  мемлекеттік қызмет көрсетілді.  Халыққа смартфон арқылы мемлекеттік қызметті алу мүмкіндігі берілді. Бүгінгі күні смартфонмен 31 қызметке қол жеткізуге болады,-деді министр.

Сонымен қатар, Blockchain технологиясын қолдана отырып «Цифрлық  ипотека» пилоты басталды. Бұдан былай азаматтар құрылыс салушының сайтында өзі қызығушылық танытқан пәтерді таңдап, ипотекалық несие рәсімдей алады.

Жылжымайтын мүлікті сатып алу және кепілге қою келісімшарты электронды түрде үш күн ішінде рәсімделеді, бұрын бір айға жуық уақыт алатын еді.   Жылжымайтын мүлікке құқықтарды тіркеу мерзімі үш күннен бір күнге дейін, шұғыл тіркеу бір күннен екі сағатқа дейін қысқартылды.

 Сонымен қатар, азаматтарға Халыққа қызмет көрсету орталықтарына бармай-ақ, «Egov» порталы арқылы жылжымайтын мүлікке техникалық паспорт алу мүмкіндігі берілді.

 Бұдан басқа, азаматтық хал актілері жазбаларының электрондық мұрағатының аясында эксаумақтық қағидаты енгізілді. Енді азаматтар құжаттарын кез келген Халыққа қызмет көрсету орталығы немесе АХАЖ бөлімі арқылы рәсімдей алады. Құжаттарды алу мерзімі отыз күннен үш күнге дейін қысқартылды. Мемлекеттік қызметтерді электронды форматқа ауыстыру азаматтардың уақыттарын үнемдеп,  қаржылық шағыстарын азайтты.

Сонымен қатар, атқарушылық іс жүргізудің процесін атқарушылық іс жүргізудің ақпараттық жүйесі арқылы автоматтандыру шаралары қабылданды.

2017 жылдан бастап бұл жүйе Республикалық сот орындаушылары палатасының сенімгерлік басқаруында.  Палата жүйені дамыту шығыстарын өздері қаржыландырады. Осылайша, аталған жүйе еліміздегі бюджет қаражатын талап етпейтін алғашқы мемлекеттік ақпараттық жүйе болып табылады.

Сондай-ақ, сот сараптамасы жүйесі цифрландырылды. Тәжірибеде, көптеген жағдайда қылмыстық, әкімшілік немесе азаматтық іс сараптаманың қорытындысына байланысты. Сараптама тағайындау және оның қорытындысын алу мерзімін қысқарту мақсатында «Е-Saraptama» ақпараттық жүйесі жасалды.  Аталған жүйе «Е-Қылмыстық іс» және «Төрелік» жүйелерімен біріктірілді, бұл тергеушілер мен судьяларға кабинеттен шықпай сараптама тағайындауға мүмкіндік берді.

Жүйе сараптама жүргізудің барлық сатысында оны үнемі бақылауға мүмкіндік береді. Аталған артықшылықтар тергеу органдарының, соттардың іс жүргізу шешімдерін қабылдау мерзіміне оң әсерін тигізді,  демек, қылмыстық іс жүргізу мерзімі қысқартылды.

• 29.12.2021
• 272