Бюрократиялық кедергілер жойылу қажет

Бюрократиялық кедергілер жойылу қажет

Сіздің жылы және жайлы баспана туралы арманыңызды түрлі кедергілер күл-талқан етті ме?! Расымен, пәтердегі бөлмелерді өзгерту немесе қосымша қабырға салу үшін біз үш бірдей бюрократиялық кедергіге тап боламыз (ХҚКО, ТИБ, әкімдік, сәулет басқармасы және т.б.).

Бұл тарапта желіден делдалдық қызметтер туралы хабарландыру табуға болатынын бәрі біледі. Себебі адамдар бюрократиядан қажыған. Нәтижесінде аталған үдеріс айналасында түрлі коррупциялық схемалар пайда болды.

Цифрлық трансформация орталығында біз осы процесті басынан аяғына дейін талдап, нормативті-құқықтық базаларды зерттеп, жан-жақты қарастырғанда, мына жағдайға көз жеткіздік: егер қайта құру нәтижесінде үй құлайтын болса, құжаттарды қабылдайтын ХҚКО қызметкері де, өлшем жасайтын жұмысшы да, сәулет басқармасы мен әкімдік мамандары да жауап бермейді! Яғни бұл кісілер - техникалық паспорт беру процесінде артық адамдар. Себебі барлық жауапкершілік техжоспарды жасаған лицензиялы жобалаушыға жүктелген.

Біздің ұсынысымыз: бұл процестен мемлекеттік органдардың қызметкерлерін алып тастау арқылы back-end бөлігін мемлекеттік сервистерге ауыстыру. Лицензиялы жобалаушыға (азаматтың келісімімен) жылжымайтын мүліктер базасына өзгеріс енгізіп, техжоспар негізінде техпаспортты ресімдеуге мүмкіндік беру.

Кеше индустрия және инфрақұрылымдық даму министрімен жаңа үдерісті талқыладық. Оған және ұжымына бұл идеяны қолдағаны үшін алғыс айтамын. Енді шұғыл түрде нормативтік және техникалық мәселелерді шешу қажет.

Егер мемлекеттік органдардың қандай бір үдерісіне реинжиниринг жасау бойынша ұсыныстарыңыз бен қызықты идеяларыңыз болса, dtc@mdai.gov.kz электрондық поштасына жолдай аласыздар.

• 08.02.2022
• 311