Мемлекет басшысы «Мемлекеттік аппараттың қызметін бюрократиядан арылту жөніндегі шаралар туралы» Қаулыға қол қойды.

Мемлекет басшысы «Мемлекеттік аппараттың қызметін бюрократиядан арылту жөніндегі шаралар туралы» Қаулыға қол қойды.

Бюрократиядан арылту – бұл қағаз жүзіндегі құжат айналымын қысқарту ғана емес, мемлекеттік басқарудың барлық салаларына жүйелі реинжиниринг және цифрлық трансформация жасау.

Қаулыдағы біз үшін маңызды мәселелерге тоқталсам:

1. Бастапқы кезеңде цифрландыру – мемлекеттік органдар өзара, сондай-ақ азаматтармен және бизнеспен көбіне цифрлық форматта әрекет етуі тиіс.

2. ЦДИАӨМ орталық және жергілікті мемлекеттік органдарда цифрлық трансформацияны және бизнес-процестердің реинжинирингін үйлестіруге, сондай-ақ ақпараттандыру объектілерінің интеграциясы мәселелері бойынша шешімдер қабылдауға жауапты орган ретінде айқындалды;

Бұрын әр мемлекеттік орган өз жүйелерін басқа меморгандардың жүйесімен интеграциялай ма жоқ па, өзі шешетін. Сондықтан көптеген интеграциялар тежеліп қалған болатын. Енді интеграциялау бойынша шешім қабылдау ЦДИАӨМ құзіретіне беріліп, бүгін мен осы бағытта жұмыс бастау туралы тапсырма алдым.

3. Мемлекеттік органдар мемлекеттік деректер базаларындағы және ақпараттық жүйелердегі деректерді қосымша тексермей-ақ, пайдалануы тиіс. Оның үстіне мемлекеттік органдардың «Smart Data Ukimet» жүйесіндегі және өзге де мемлекеттік ақпараттандыру объектілеріндегі қолжетімді мәліметтерді сұратуына және беруіне тыйым салынады. Яғни мемлекет базаларда болуы тиіс ақпараттарды азаматтардан немесе бизнестен талап ете алмайды.

Қызметтік электрондық поштаны коммуникацияның және меморгандардың ақпарат алмасудағы ресми құралы ретінде пайдалану – жақсы шешім, өйткені мемлекеттік қызметкерлер кез-келген себеп бойынша хат-хабар жазуға мәжбүр.

Мемлекеттік қызметтер реестрін жасау ретін қайта қарау мәселесі бұрыннан туындаған еді. Азаматтар түрлі жағдайға түсуі мүмкін, бірақ өкінішке қарай қазіргі реестрде барлық өмірлік жағдайлар стандарттандырылмаған. Бұл орайда реестр заманға сай жасалуы тиіс.

Бүгінгі таңда базаларда ескі және қате деректер жетіп артылады, нәтижесінде азаматтар мен бизнес өкілдері мемлекеттік қызмет алу барысында бірқатар кедергілерге немесе айыппұлдарға тап болады. Бұл тұрғыда теріс деректерді жөндейтін ыңғайлы және қарапайым құрал жоқ, азаматтар қате мәліметтерді жөндету үшін кабинет аралап, табан тоздырады.

Мемлекеттік ақпараттық жүйелерді жасау және дамыту мерзімін алты айға дейін (қазір 1,5 жыл) қысқарту арқылы мемқызметтерді цифрландыру тиімділігін арттырып, адамдарға қажетті қызметтерді жылдамырақ ұсынуға мүмкіндік береді.

Осы реформалардың өзегі – әр қазақстандықтың мүддесі, яғни біз мемлекеттік аппаратты басқарудың «адамға бағдарланған» моделіне өтудеміз. Және бұл Қаулы - осы жолдағы маңызды қадамдардың бірі.

• 19.04.2022
• 176