Бүгін ішкі істер министрі Марат Ахметжановпен мобильді жиналыс өткіздік.

Бүгін ішкі істер министрі Марат Ахметжановпен мобильді жиналыс өткіздік. Нұр-Сұлтандағы автоХҚКО-да жаңа биометриялық жүйенің жұмысын қарадық. Бұл жүйе жүргізуші куәлігін алуға келген үміткердің тұлғасын анықтап, теориялық сынақ барысында сыбайлас жемқорлыққа жол бермейді. Оның үстіне автодромдағы практикалық емтиханның процесін ашық ету және қадағалау үшін жаңа GPS-жүйе орнатылған. Өзіміз де автодромдағы GPS-терді сынақтан өткізіп көрдік. Тағы бір жақсы жаңалық – жуырда қазақстандықтар мемлекеттік нөмірге онлайн тапсырыс бере алады, ал сандар комбинациясы автоматты түрде құрылатын болады.

№1 ХҚКО-да «Азаматтарға арналған үкіметтің» төрағасы Suienish Abdildin жеке куәлік беретін автоматтандырылған терминалды көрсетті. Терминал биометриялық жүйемен жабдықталған, суретке түсіру функциясы бар, интерфейсі де түсінікті. Сол арқылы куәлікті алуға өтініш беріп, суретке түсіп, қолтаңбаңыздың үлгісін қалдырып, QR-кодпен мемлекеттік бажды төлеуге болады. Мұндай терминалдар ХҚКО қызметкерлерінің жүктемесін азайтып, құжатты ресімдеу процесін жеделдетеді. Марат Ахметжановпен куәлікті eGov порталы арқылы ресімдеу мүмкіндігін талқыладық.

Полиция департаментінің астаналық басқармасында «жаппай бейнебақылау» құру жүйесімен, қоғамдық орындарда және мектептерде орнатылған SOS түймесі – шұғыл көмек шақыру құралдарының жұмысымен таныстық. Тек қана бұзушылықтарды ғана емес, болашақта ұрланған көліктерді де анықтайтын «Сергек» жүйесінің функциясын кеңейту туралы сөйлестік.

ЦДИАӨМ және ІІМ-нің екінші деңгейлі банктермен жұмысын әрі қарай жалғастыру мәселесі де талқыланды. Мобильді қосымшалар арқылы қолжетімді мемқызметтердің қатары көбеюде. Қазақстандықтарға сынамалық тестілеуден eGov порталы арқылы өту мүмкіндігін ұсыну идеясы бар. Бұл орайда автомектептердегі оқу сапасын көтеріп, емтихан қабылдау кезіндегі талаптарды күшейту керектігі жөнінде айтылды.

Цифрлық құжаттар бойынша. Полиция қызметкерлері цифрлық құжаттарды қабылдамайтыны туралы мәселе бірнеше рет көтерілген. Мұның себебі кез-келген меморганда, соның ішінде ІІМ-де өз нормативтік-құқықтық актілері бар, соларға тиісті өзгерістер енгізу керек. Бұл мәселе де шешілетін болды. Жуырда ІІМ органдарында азаматтардың цифрлық құжаттарын қабылдайтын болады.

Жалпы, бүгінгі кездесу нәтижелі өтті. Марат Ахметжанов ІІМ органдарын цифрландыруды толығымен қолдайды. Сондықтан бұл процесті одан әрі жандандырып, инновацияларды енгізуге келістік.

• 19.04.2022
• 204