Бүгін халықаралық Түркі академиясының президенті, «Егемен Қазақстан» АҚ басқарма төрағасы Darhan Qydyráli және Түркі академиясының вице-президенті Физули Маджидлимен кездестім.

Бүгін халықаралық Түркі академиясының президенті, «Егемен Қазақстан» АҚ басқарма төрағасы Darhan Qydyráli және Түркі академиясының вице-президенті Физули Маджидлимен кездестім. Түркі әлемінің интернеттегі идентификациясы туралы әңгіме қозғап, бірнеше мәселені талқылап, пікір алмастық.

Біріншіден, Түркі әлемі мұрасының қоры – «Аталар мирасы» порталының аясын кеңейту. Қазақ, түрік, ағылшын және орыс тілдерінде мәлімет беретін порталда түркітілдес халықтардың, ұлыстар мен этникалық топтардың ежелгі заманнан бүгінге дейінгі рухани мұралары топтастырылған.

Екіншіден, Түркі әлемінің энциклопедиясын жасау. Тарихы тереңде жатқан көне түркінің деректер базасы қомақты болары сөзсіз. Бұл орайда «Түркістан энциклопедиясының» 3 томдығы бар және түркітілдес елдердің ортақ энциклопедиясын жасау осы еңбектің негізінде жалғасатын болады.

Үшіншіден, Түркі әлеміндегі ғылыми жұмыстардың цифрлық нұсқасын жасау. Бұл орайда, расымен, қазіргі таңда түркітілдес халықтардың ғылыми зерттеулерінің ортақ қоры жоқ. Нәтижесінде, ғылым әлемінде жиі кездесетін плагиат проблемасы да өршіп тұрғаны белгілі. Сондықтан ғылыми диссертациялар мен архивтерді цифрландыру процесіне түркітілдес елдерді жұмылдырып, ортақ мақсаттағы жобаға айналдырсақ, жақсы болар еді.

Әрине, Цифрлық даму, инновациялар және аэроғарыш өнеркәсібі министрлігі түбі бір түркі халықтарының бірлігін бекем етер бастамаларды қолдайды және Түркі академиясымен бұл бағыттағы ынтымақтастықты нығайтамыз. Себебі тарихымызды түгендеп, елдігімізді еңселі етіп, рухани мұрамызды өскелең ұрпаққа табыстау – әрбіреуіміздің азаматтық парызымыз.

• 25.04.2022
• 282