ОБЛЫС ӘКІМІ «ТОРҒАЙ ПЕТРОЛЕУМ» КОМПАНИЯСЫНЫҢ 100-ДЕН АСА ЖҰМЫСШЫСЫМЕН КЕЗДЕСТІ

Сыр өңіріндегі барлық өнеркәсіп өндірісінің 70%-дан астамы мұнай өндіруге тиесілі. Соңғы кезде кен орындарының сарқылуына байланысты мұнай өндірісінің көлемі жылдан-жылға қысқарып келеді. Бұл жағдай облыс тұрғындарына да елеулі әсер етеді.

Облыс әкімі Нұрлыбек Нәлібаев «Торғай-Петролеум» акционерлік қоғамының ұжымымен кездесіп, компанияның түйткілді мәселелерін талқылады.

Аймақ басшысы қазіргі таңда мұнай-газ саласында 10 мыңға жуық адам жұмыс жасайтынын және облыс бойынша орташа отбасылық коэффициент 5-ке жуық екенін ескерсек, бұл бүгінде кемінде 50 мың адамның әл-ауқаты мұнай саласындағы жағдайға тікелей байланысты екенін білдіретінін атап өтті.

 «Торғай-Петролеум» акционерлік қоғамы өндірілген мұнайдың 36,2 %-ын экспорттады, ал, 2020 жылы экспорт 16,4 %-ды құрады, яғни экспорт көлемі 2,2 есеге ұлғайған. Бұдан басқа, «Кеңқияқ – Атырау" реверсін пайдалануға беру арқылы «Торғай-Петролеум» компаниясында мұнай экспортына квота артты.

Қазіргі таңда «Торғай-Петролеум» компаниясы 500-ге жуық адамды жұмыспен қамтиды. Бүгінгі таңда компания өндіру көлемінің төмендеуі, кен орындарының сулануы секілді қиындықтарға тап болды. Бірақ осы қиындықтарға қарамастан, компания әлеуметтік қолдауға, жұмыс орындарын сақтауға, жұмыскерлердің табысын арттыруға ерекше назар аударуда», - деді Н.Нәлібаев.

Компания өңірдің әлеуметтік-экономикалық дамуына зор үлес қосып келгенін атап өткен аймақ басшысы ортақ мақсатқа жету үшін бірлесіп жұмыс жасауға шақырып, облыс әкімдігі өз кезегінде туындаған мәселелердің шешілуіне атсалысуға әрқашан дайын екенін жеткізді.

Жиында «Торғай Петролеум» компаниясының бас директоры Қайрат Арынғазиев әлеуметтік міндеттемелерін орындау барысын баяндады, ал ұжым өкілі Марзия Амраева өндірістегі қызметкерлерді біріктіру және олардың мүдделерін қорғау бойынша кәсіподақ тарапынан атқарылған жұмысты таныстырды.

Кездесу соңында облыс әкімдігі мен «Торғай Петролеум» кәсіпорны өзара түсіністік пен ынтымақтастық туралы Меморандумға қол қойды.

Облыс әкімінің баспасөз қызметі

• 16.06.2022
• 403