Достар, біз алғаш рет өзіміздің кәсіби мерекемізді атап өтудеміз

Баршаңызды Цифрландыру және ақпараттық технологиялар қызметкерлері күнімен құттықтаймын!
Кәсіби мерекемізге арнайы күн белгіленетіндей дәрежеге жеттік (бұрын бұл мереке байланыс қызметкерлерімен немесе ақпарат қызметкерлерімен бірге тойланатын).
20 жыл ішінде біз цифрландыру сыбайлас жемқорлықты жеңе алатынын және көптеген маңызды мәселелерді шешудің драйвері болатынын дәлелдедік.
Бүгінгі таңда цифрландыру барлық салаларды қамтыған. Қарап отырсаңыз, қазір мәселелерді онлайн шеше салуға болады, экономикада IT мен цифрасыз сала, чипсіз станоктар, сайтсыз компаниялар, электрондық төлемсіз саудагерлер жоқ.
Көп жағдайда қазақстандық ІТ негізін қалаушылардың арқасында біз өлкемізде цифрлық саланы алдыңғы қатарға шығарып, ал кебір позициялар бойынша әлемдік асуды да алдық!
Бүгін көп жылдар бойы ақпараттық технологиялар мен саламызды дамыту жолында еңбек еткен 50-ден астам қызметкерді «Үздік цифрландырушы» ведомстволық наградасымен марапаттадым. Мен үшін бұл үлкен мәртебе.
Жыл өткен сайын қатарымыз көбейіп, құзыреттілік артқандықтан, бізге жүктелген сенім де ұлғайды. Сондықтан халқымыздың, ел басшылығының үмітін ақтау үшін қажырлы жұмысымызды жалғастыра берейік!
Дербес кәсіби мерекеміздің пайда болуы еліміздің цифрлық трансформациясына жаңа серпін береді деп ойлаймын.
Баршаңызға зор денсаулық, отбасылық бақыт және еңбекте толағай табыс тілеймін.
Мереке құтты болсын!

• 11.11.2022
• 250