IT-саласындағы қазақстандық студенттердің халықаралық аренадағы кезекті жарқын жетістігі

10 қарашада отандастарымыз командалық бағдарламалау бойынша әлем чемпионатының финалында бақ сынаған болатын. Айтулы бәсеке Бангладеш елінің Дакка қаласында өтті.
Сайыс FAANG (Facebook, Apple, Amazon, Netflix, Google) үшін беделді конкурстардың бірі болып табылатынын атап өткен жөн.
Біздің студенттеріміздің басым бөлігі осы жарыстың түрлі кезеңдерінде (ширек финал, жартылай финал) қарсыластарын шаң қақтырды. Олардың халықаралық бағдарламау (World Finals ICPC) сайысының шешуші кезеңіне өтуі - бұл үлкен жетістік!
World Finals ICPC бәсекесіне Қазақстаннан екі команда қатысты. Бұл Халықаралық ақпараттық технологиялар университеті (ХАТУ) және Suleyman Demirel University (SDU).
Байқаудың финалына әлемнің түкпір-түкпірінен үздік 132 университет командасы қатысты.
Осылайша, Халықаралық ақпараттық технологиялар университетінің (ХАТУ) студенттері 25-ші орынға ие болды. Олар Мәскеу мемлекеттік университеті, Мәскеу Физико-техникалық институты, KAIST, Торонто, Гонконг университеттері сияқты және әлемнің бірқатар танымал жоғары оқу орындарын артта қалдырды. Бұл мақтануға тұрарлық жеңіс!.
Бұдан бөлек, Сүлеймен Демирел университетінің командасы 111-орынға ие болды. Команда атынан қатысқан студенттер: Темірлан Байболов, Әбу Саид Манап, Алмас Кеңес және команда жетекшісі- Ербол Байғариев.
Халықаралық ақпараттық технологиялар командасының құрамында: Батыр Сардарбеков, Абай Баймұқанов, Парасат Қызылқанов және ұстаздары- Қуанышбай Айбар, ХАТУ олимпиадалық резервінің басшысы Сұлтанов Ескендір болды.
Мұндай жетістіктер біздің бәсекеге қабілеттілігімізді әлемдік деңгейде дәлелдейді. Сондай-ақ, бұл сапалы білім деңгейімен халықаралық стандарттарға сай мамандар дайындайтынымызды көрсетеді.
Осындай тамаша нәтижеге елеулі үлес қосқаны үшін ел құрамасының бапкері - Темірлан Сатылғановқа алғыс айтқым келеді.
Жастарға болашақта одан да үлкен белестерді бағындыруды тілеймін! Жеңістеріңіз көп болсын!

• 14.11.2022
• 253