Бүгін Алматылықтармен кездесу өткіздім

Министрлік тарапынан цифрландыру, байланыс сапасын жақсарту және "көрінбейтін үкімет" тұжырымдамасын енгізу бағыттары бойынша атқарылып жатқан жұмыстар жайлы айтып бердім.
Байланыс сапасын арттыру мәселесі әрдайым басты назарда және қала тұрғындарынан осы мәселе бойынша көптеген шағымдар келіп жатады. Байланыс сапасын арттыру бағытындағы шаралардың бірі ретінде біз айыппұлдарды ұлғайтуды көздейтін тиісті заңнамаға түзетулер енгіздік. Мәселен, осының арқасында операторлар Алматыда байланыс сапасын арттыратын 8 жаңа базалық станция орнатты, сондай-ақ 5-уін жақсартты.
Кездесу барысында 5G технологиясының қаншалықты қажет екендігі туралы сауал қойылды, 5G уақыт талабы екенін атап өткім келеді. Технологиялар қазір қас-қағым сәтте дамып келеді және интернет бірге ілесуі керек. Егер біз әрдайым алда болғымыз келсе, онда жылдам интернетті өзімізде де енгізуіміз керек. Айтпақшы, Алматыда биыл 5G технологиясы бар 5 базалық байланыс станциясы орнатылды. 2023 жылы желімен қамту 15% -ға жетеді.
"Көрінбейтін үкімет" тұжырымдамасына келетін болсақ, біз қазақстандықтардың өміріне проактивті форматты біртіндеп енгізіп жатырмыз. Мысалы, қазірдің өзінде 26 проактивті қызмет бар, көп ұзамай бұл көрсеткіш 38-ге жетеді. Ірі проактивті жобалардың бірі – "отбасының цифрлық картасы", ол 6 млн қазақстандық отбасын 80 параметр бойынша бақылауға мүмкіндік береді.
Осының негізінде қиын жағдайларды анықтау және тиісті көмек көрсету  шаралары қабылданады.
Айтпақшы, бүгін кездесуге қатысушылардың бірі, егер Дамумед қосымшасы бола тұра, бізге e-Densaulyq жүйесі не үшін керек?-деген сауал қойды? E-Densaulyq жүйесін енгізу арқылы Damumed немесе басқа компаниялардағы барлық деректерді біз мемлекеттік жүйеде шоғырландырамыз, бұл компаниялардың жұмысы тоқтаған сәтте немесе басқа да жағдайларда пациенттер деректерінің сақталуын қамтамасыз етеді.
Бүгін тұрғындар тарапынан қойылған барлық сұрақтарға жауап беруге тырыстым, олардың ұсыныстарын басты назарға алып, көтерілген мәселелерді шешу бойынша жұмыс істейміз. Кездесуге арнайы келіп, белсенділік танытқандары үшін Алматы тұрғындарына ризашылығымды білдіргім келеді!

• 24.11.2022
• 277