Сенатқа геодезия, картография және кеңістіктік деректерге қатысты заң жобаларын ұсындым

Қолданыстағы «Геодезия және картография туралы» Заң 2002 жылы қабылданған, сондықтан жаңа редакцияны қажет етеді.
Технологиялардың қарқынды дамып келе жатқанын ескерсек, 20 жылда көп нәрсе өзгерді, сондықтан заңға толықтырулар енгізу бірінші кезекте - заман талабы!
Заң жобаларының негізгі мақсаты- елімізді жоғары дәлдікті геодезиялық координаталар жүйесімен қамтамасыз ету және елдің бірыңғай цифрлық картографиялық негізін құру. Атап өтсем, қазір Қазақстанда 1942 жылғы мемлекеттік координаттар жүйесі қолданыста. Әрине, жүйе әлдеқашан ескірген.
Бірыңғай мемлекеттік координаттар жүйесінің ашық түрде қолжетімді болмауы - қазіргі кезде стандарттарға сай келмейтін және заңмен бекітілмеген координаттар жүйелерін қолдануға әкелді, мысал ретінде алсақ, бір елді мекенде бірнеше координаттар жүйелері қолданылады.
Нәтижесінде әртүрлі жүйелерде кеңістіктік деректердің үлкен көлемі жинақталған, бұл кеңістіктік ақпаратты пайдалану процестерін қиындатады және кейде тікелей кедергі келтіреді.
Заң жобалары кеңістіктік деректердің ұлттық инфрақұрылымын енгізуді көздейді, яғни бір платформада дәйекті, жедел және өзекті ақпаратты тиімді пайдалану үшін бірыңғай форматта және бірыңғай талаптар бойынша кеңістіктік деректер ұсынылатын болады.
Заң жобасын іске асыру нәтижесінде жер қатынастары, сәулет, құрылыс, табиғатты пайдалану, қоршаған ортаны қорғау, геология, тұрғын үй-коммуналдық және ауыл шаруашылығы саласында халыққа көрсетілетін қызметтердің жеделдігі мен сапасын арттыру, сондай-ақ, әділ бәсекелестік үшін жағдайлар жасау, мемлекеттік бақылауды жүзеге асырудың тиімділігі мен жеделдігін арттыру көзделеді.
Кеңістіктік деректердің ұлттық инфрақұрылымын енгізу жобасы «ҚАЗГЕОДЕЗИЯ» Ұлттық геодезия және кеңістіктік ақпарат орталығы ұжымының қажырлы еңбегінің арқасында жүзеге асып отыр. Нәтижелі жұмыс үшін оларға алғыс білдіремін.

• 02.12.2022
• 339