Қазақстандықтар enpf-otbasy.kz платформасы арқылы тұрғын үй мен емделу ақысын төлеуге 1,5 триллион теңге зейнетақы жинақтарын пайдаланды

Біржолғы зейнетақы төлемдерінің (әрі қарай-БЗТ) көмегімен тұрғын үй жағдайын 279 859 қазақстандық жақсартып үлгерді. Олардың ішінде 147 747 адам зейнетақы төлемдерін ипотекасыз тұрғын үй сатып алуға жұмсаған. Бұл мақсатқа жалпы көлемі 1 триллион теңгеден астам қаражат кеткен. Тағы 44 100 қазақстандық «Отбасы банкіндегі» («Бәйтерек» холдингінің еншілес ұйымы) заем бойынша қарыздарын өтеуге 118 млрд теңге жаратқан. 31 мың адам өзге екінші деңгейлі банктерде 117 млрд теңгеге ипотекалық қарызы төлеген. Ал 17 мыңға жуық азамат зейнетақы төлемдерін Отбасы банкінен несие алу үшін алғашқы жарна түрінде жұмсаған.

Олардың 84% екінші нарықтан баспана алса, 16% бастапқы жарнаны құрылыс салушыларға төлеп, жаңа үйлерден баспана алуды жөн көрген. Тағы 29 793 қазақстандық жалпы көлемі 30 млрд теңге зейнетақы жинақтарын емделу мақсатына жұмсаған.

БЗТ қолданған қазақстандықтардың орташа жасы - 41, дені ер азаматтар (68%). Нұр-Сұлтан қаласы, Маңғыстау облысы мен Алматы қаласы зейнетақы төлемдерін баспана алу үшін ең көп қолданған аймақтардың алғашқы үштігінде. Ал Солтүстік Қазақстан облысының тұрғындары БЗТ пайдалануға ең төмен қызығушылық танытқан.

- Қазақстандықтарда отбасылық құндылықтар жақсы дамыған. Олар туыстарына көмектесуге асық және бұл мүмкіндікті белсенді түрде пайдалануда. Оған біздің статистика куә. Осылайша, 279 859 адамның 35%-ы жинақтарын жартылай немесе толығымен туыстарынан алып, өздерінің тұрғын үй жағдайларын жақсартты. Тіпті туысқандардың аз ғана зейнетақы жинақтарының өзі отбасы ішінде біріктірілгенде, тұрғын үй сатып алуға немесе қолжетімді шарттармен несие алу үшін бастапқы жарна төлеуге мүмкіндік берді - деді банктің Басқарма төрайымы, Ләззат Ибрагимова.

Ол азаматтарымыздың ыңғайлығы үшін enpf-otbasy.kz платформасы іске қосылған сәттен бастап күн сайын жетілдіріліп келетінін атап өтті. Қазір БЗТ шетелде емдеуге және дәрі-дәрмек сатып алуға жұмсау мүмкіндігі қол жетімді болды.

Сонымен қатар, платформа қолданушылары қателесіп кетсе немесе қаражатты пайдалану жөніндегі шешімін өзгертсе, бір ғана батырманы басу арқылы төлемдерін БЖЗҚ-на қайта аудара алады. Бұған дейін ақшаның зейнетақы қорындағы шотқа автоматты түрде оралуы үшін 45 күн күту қажет болатын.

БЗТ туысқанға тағайындау кезінде туыстықты белгілеуден қате кетсе, бір ғана батырманың көмегімен туысқандық қарым-қатынас түрін өзгертуге болады. Сондай-ақ enpf-otbasy.kz платформасын қолданушы жеке мәліметтерін қате енгізсе, оны түзету мүмкіндігі пайда болды.

2021 жылдың 27 қыркүйегінен бастап Отбасы банк клиенттері интернет-банкингте және мобильді қосымшада БЗТ есебінен несиелерін толық немесе ішінара өтей алады. Бұрын бұл қызметті enpf-otbasy.kz платформасы арқылы жүзеге асыру мүмкіндігі болғанымен, салымшы банк бөлімшесіне барып, төлем кестесін өзгертуге өтініш жазуы қажет болатын. Бүгінде бұл қызмет автоматтандырылды.

            Қазіргі уақытта Отбасы банк қызметкерлері «БЗТ қаражаты есебінен Тұрғын үй құрылыс жинақ депозиттерін толықтыру» мүмкіндігі қол жетімді ету бағытында жұмыс жасауда. Бұл мүмкіндік Зейнетақы төлемдерін пайдалану ережесіне өзгерістер бекітілген бетте қол жетімді болады.

• 29.09.2021
• 362